Tweet
На Говрлево му недостигаат лабораториск&
Неолитскиот локалитет, каде што е откриена скулптурата Адам, се' уште е со нерешени имотноправни односи
Неолитски локалитет Говрлево крај Скопје, кој го привлече вниманието на јавноста со откриените скулптури Адам и Големата Мајка, според раководителот на археолошките истражувања, Милош Билбија од Музејот на град Скопје, стигна до нова фаза.
За заокружување на историјата на просторот во пошироки рамки, освен започнатите ископувања планирани до длабочина на ниво на здравица, Билбија укажува дека е потребно да се направат и дополнителни анализи на откриениот семенски материјал, на почвата, на коскениот материјал од животинско потекло. Според неговите планови, идната година откриениот материјал би требало и да се презентира на изложба и да добие посебна монографија.
Годинава истражувањата со финансиска поддршка од 300 илјади денари од Министерството за култура, треба да започнат да се реализираат во септември, при што документацијата ќе се прибира по дигитален пат. Минатата есен, стратиграфските мерења со современа, софистицирана опрема, на Говрлево ги вршеше словенечки студент, кој во археолошките истражувања учествуваше во рамките на започнатата соработка со Институтот Приморска од Копар, Словенија.
„Со користење на т.н. тотална станица, денес мерењата се вршат за неколку минути, за разлика од претходно, кога документацијата за локалитетот се правеше со месеци. Досегашните сознанија говорат дека просторот што се истражува имал посебна, обредна функција во населбата. Во тоа оди во прилог и геолошката положба на просторот, но за да се добијат сите релевантни сознанија, потребно е воспоставување на соработка со институции на меѓународно ниво, каде би се правеле потребните лабораториски анализи. Ние не треба да се задоволиме само со постоењето на скулптурите Адам и Големата Мајка и другите откриени материјали, туку ни требаат и нови резултати за да извлечеме пошироки сознанија за просторот.
Според ова што до сега го знаеме, локалитетот Говрлево покажува дека во време на постоење на населбата, пред 6.000 години таа имала различни еко - географски, а со тоа и климатски карактеристики. Амбиентот бил таков, што создавал услови за човечко делување и човечко живеење на едно место што му овозможило на тогашниот човек, на свој начин и да го согледа светот“ - вели Билбија.
Локалитет Говрлево е откриен во 1982 година. Истоименото село во рамките на македонско - словенечки проект во 2003 година беше и етнолошки истражено и за него е објавена и посебна монографија. Но, сеуште не се решени имотно - правните односи со сопственикот на плацот на кој се реализираат археолошките истражувања.
Археологот Милош Билбија вели дека благодарение на разбирањето и соработката со сопственикот, истражувањата течат, но дека овој проблем кој е под ингеренции на општината Сопиште, треба што поскоро и да се реши.
