Tweet
Одлагањето на решавањето на проблемот со името може да доведе до дестабилизација, предупреди денеска евроамбасадорот Фуере од Брисел. Европа бара од македонската влада да покаже лидерство за најважните теми.
„На владата и повторувам од колку витална важност е да се реши името ова е момент за лидерство и храброст, опасности постојат ако се одложува, бидејќи тоа може да предизвика тешкотии помеѓу заедниците и дури и нестабилност“, вели Фуере.
Ова предупредување доаѓа денеска, на редовното годишно обраќање на евроамбасадорот пред европратениците во Брисел, кои се подготвуваат да гласаат резолуција за Македонија. Тие се интересираа за развојот на Македонија во сите области.
Од добивањето на препораката за старт на преговори со ЕУ, темпото на европската реформска агенда е забавен, потврди евроамбасадорот по низата прашања на оваа тема.
Тој предупреди дека се чека на усвојувањето на законот за антидискриминација како и имплементацијата на реформите во јавната администрација, за која владата се заложи дека ја исполни. Врз основа на ова ветување меѓу другото, македонија доби препорака за преговори.
ЕУ не е задоволна ни од имплементацијата на Рамковниот договор. Односите помеѓу заедниците во Македонија не ги задоволуваат европските критериуми.
ЕУ не го заборава инцидентот со контроверзната македонска Енциклопедија.
„Коалицијата минатата година беше релативно стабилна и покрај проблемите со енциклопедијата која беше пропуштена можност за помирување. Тоа отвори теми за кои мислевме дека се затворени со охридскиот договор и укажува уште колку работа има за помирување“, рече Фуере.
Македонија има шест месеци да го реши проблемот со името за да добие преговори, во меѓувреме не смее да заборави дека европските реформи треба да се спроведуваат во континуитет, а не само пред клучните извештаи.
Европратеникот Јелко Кацин, но и амбасадорот Фуере го повикаа македонското Собрание да ја усвојат резолуцијата за геноцидот во Сребреница. Македонија е единствената земја од поранешна Југославија која не ја усвоила оваа резолуција, кој дури и Србија се очекува да ја усвои идниот месец. Пратеникот Кацин ги повика македонските пратеници да докажат дека не се плашат од евентуална негативна реакција од Белград.
Comment