Tweet
Здруженијата на Македонците од егејскиот дел на Македонија се охрабрени од последните меѓународни извештаи за постоење на македонско малцинство во Грција, а особено од извештајот на независниот експерт на ОН за малцински прашања Геј Мекдугал.
- Меѓународните организации и во изминативе 50 години ја посетувале Грција и заклучувале дека постојат национални малцинства, но резултатите секогаш биле негирани од Атина. Значајно е што последниот извештај е направен врз основа на непосредни контакти, преку кои е согледано дека во северниот дел на Грција живеат Македонци - рече Георги Ајановски на вчерашната прес-конференција, посочувајќи дека најголеми заслуги за тоа имаат македонските здруженија во Грција, кои бараат културна автономија.
Ѓорѓи Доневски рече дека во последните две години е променет односот кон егејското прашање, за кое во изминатите речиси 60 години никој не презел ништо и не ги барал правата на Македонците во Грција.
- Со поддршката од Владата и резолуцијата од Собранието на Република Македонија остваривме сè што можевме во нашата држава, а сега на ред е Европа. Доколку и Европа донесе слична резолуција како македонското собрание, Грција нема да може и неа да ја прогласи како провокација и ќе мора нешто да преземе во врска со македонското прашање. Убеден сум дека за година-две ќе ни бидат вратени нашите права и сè што ни е одземено, а одземени ни се имотот и правото на државјанство во државата во која сме се родиле - рече Доневски.
Тој посочи дека од 31 март до крајот на годинава, со поддршка на Министерството за култура на Република Македонија, ќе се реализира програмата за одбележување на 60-годишнината од завршувањето на Граѓанската војна во Грција во која, како што посочи, учествуваа вкупно 25.000 војници на ДАГ, од кои 15.000 македонски борци. Од нив 30 отсто жени.
- Одбележувањето ќе почна на 31 март, денот на почетокот на Граѓанската војна, со собир на кој ќе стане збор за причините за почнување на војната, а при крајот на годинава ќе се одржи собир на кој ќе се зборува за последиците од Граѓанската војна - рече Доневски, нагласувајќи дека преку одбележувањето сакаат со факти да им откријат на македонската и на светската јавност што се случуваше во егејскиот дел на Македонија во периодот од 31 март 1946 до почетокот на септември 1949 година, кога заврши војната.
Во програмата, меѓу другото, предвидено е изградба на спомен-парк во Катланово на борците и на жртвите од Егејска Македонија во антифашистичката борба и Граѓанската војна (1941 - 1949), поставување биста во паркот „Жена-борец“, посветен на македонските жени-борци во Демократската армија на Грција (ДАГ), организирање подвижна изложба на фотографии и документи за борбата на Македонците во Грција од 1941 до 1949 година, снимање документарен филм посветен на Граѓанската војна, издавање повеќе публикации...
